“Unë jam pranuar në Basel falë vëllait dhe babait tim. Ata donin që të merrnin vetëm atë, por babai u tha: ‘O të dy, o asnjërin’. Ata u detyruan të më merrnin dhe mua”,tha Graniti.
Kapiteni i kombëtares së Zvicrës dhe një ndër liderët e Arsenalit, Granit Xhaka ka rrëfyer së fundmi historinë se si ai u bë pjesë e futbollit falë vëllait të tij dhe këmbënguljes së babait.
Në një intervistë për mediat zvicerane, Graniti ka rrëfyer për fëmijërinë në Basel. “Taulanti është më i talentuar se unë. Karakteristika ime kryesore është se jam punëtor i madh. Unë jam pranuar në Basel falë vëllait dhe babait tim. Ata donin që të merrnin vetëm atë, por babai u tha: ‘O të dy, o asnjërin’. Ata u detyruan të më merrnin dhe mua”, ka treguar Graniti, që luan tani në Arsenal.
Xhaka ka treguar se ai nuk mendonte asnjëherë që do të arrinte në këto nivele, pasi gjithmonë shihej me syrin e futbollistit që kishte më pak talent. “Duke qenë se isha gjithmonë ai që konsiderohesha me më pak talent, nuk e mendoja asnjëherë se do të bëhesha profesionist. Një ëndërr e kthyer në realitet. Gjë e mirë që ia dolëm të dy”.
Megjithatë, edhe karriera e vëllait të vogël nuk ishte pa vështirësi. “Në moshën 15 vjeçare kam këputur ligamentin. Ai ishte një moment që më forcoi shumë dhe ndikoi në mentalitetin dhe psikologjinë time”, theksoi ai, që është shpallur edhe kampion i botës me Zvicrën për të rinjtë.
Ai nuk e harron asnjëherë vendlindjen e tij në Zvicër. “Sa herë kam dy ditë pushime, shkoj në Bazel. Takoj familjen time dhe kur luan Baseli shkoj në stadium për të mbështetur Taulantin. Do të rikthehem një ditë, natyrisht nuk e mendoj këtë gjë në moshën 28-vjeçare, por mendoj kur të jem 30 vjeç si Alex Frei. Të fitoj dhe ndonjë titull. Një ëndërr e madhe kur kthehesh dhe natyrisht që pritshmëritë janë më të larta”, është shprehur Granit Xhaka.
Vëllezërit Xhaka nuk do ta harrojnë kurrë përballjen si kundërshtar me njëri-tjetrin, pasi Graniti mbronte ngjyrat e Zvicrës dhe Taulanti të Shqipërisë u përballën me njëri tjetrin në Euro 2016.
