Krimet e Rënda u kanë kërkuar tre bankave të nivelit të dytë, shifrën zyrtare të parave që kishin destinuar për ti dërguar jashtë vendit në datën 9 prill, ku dhe u krye vjedhja spektakolare. Paratë u grabitën në Rinas nga 5 të dyshuar, mes tyre dhe Admir Murataj, i cili mbeti i vrarë. Fillimisht shifra e pretenduar ishte 10 milionë euro të vendosura në 7 thasë, 5 me kartëmonedha dhe 2 me monedha metalike, por ministri Lleshaj dha sot në Kuvend një tjetër shumë.
Lleshaj tha se shuma e grabitur në aeroportin e Rinasit është mbi 5 milionë euro, ndërsa shtoi se kompania e sigurisë ICTS-së nuk licencohet nga Policia e Shtetit, por nga Aviacioni Civil.
Në vijim ai paralajmëroi masa ndaj kompanisë. “Shifrat e grabitura, është diku te 5 pikë disa milionë euro. Punonjësit e ICTS-së, arrogantë, deri sot kjo kompani nuk është licencuar nga policia, por Aviacioni Civil, do të merren masat që të futen në suazën e licencimit të Policisë së Shtetit”, tha ai.
Kujtojmë këtu se në vendngjarje, 2 km larg Rinasit ku u realizua shkëmbimi i zjarrit janë sekuestruar 10 gëzhoja armë kallashnikov, të cilat po ekzaminohen nga policia së bashku me automatikun e Admir Murataj.
Po kështu, ish-kryeministri Sali Berisha hedh dyshime të forta se Admir Murataj nuk është vrarë nga policia. Nëpërmjet mesazhit të një qytetari, Berisha shkruan se vendi ku ka ndodhur vrasja nuk ka fushë pamje për policinë. Sipas denoncimit, makina e policisë që pretendohet se është përplasur me grabitësit, nuk ka asnjë gërvishtje.
