Posta sekrete e Prokurorisë së Durrësit u grabit këtë të martë nga dy persona ende të panjohur. Ngjarja ndodhi rreth orës 11:00, në lagjen nr.11 të Durrësit, pranë filialit të postës.
Sipas policisë, korrieri i prokurorisë, me inicialet I.K, sapo kishte marrë postën sekrete, kur iu afruan dy persona të cilët e goditën me forcë dhe me dhunë i morën materialet që kishte në disa pako në të cilat ndodheshin materialet sekrete të Prokurorisë. Menjëherë pas krimit, personat u larguan në drejtim të panjohur ndërsa për ngjarjen u njoftua Policia e Durrësit.
Menjëherë hetues të policisë dhe të prokurorisë mbërritën në vendin e ngjarjes për të nisur hetimet. Policia ka marrë dëshminë e korrierit, i cili pohoi se personat e goditën në mënyrë të befasishme. Më pas ata i morën materialet dhe u larguan me shpejtësi. Ende nuk dihet se çfarë përmbajtjeje kishin materialet e postuara, por burimet thonë se bëhet fjalë për dokumente me karakter hetimor sekret. Policia po kqyr pamjet e kamerave të sigurisë së zonës për të identifikuar të dyshuarit.
