Ushtruan dhunë e më tej e grabitën. Kjo është historia e mjekut Kujtim Albrahimi, i cili mbrëmjen e kaluar ra pre e grabitësve bashkë me bashkëshorten, e ndërsa është i bindur se autorët ishin profesionistë.
Ai ka rrëfyer para uniformave blu se autorët kishin shkëputur sinjalin e alarmit, që të hypnin pa problem në banesë dhe gjithashtu kishin hequr kamerat, e kishin marrë serverin e tyre për të zhdukur pamjet.
Po kështu, policia ka nisur hetimet për identifikimin dhe kapjen e autorëve që dyshohet se kanë marrë mbi 10 milionë lekë, dhe bizhuteri të çmuara nga banesa e mjekut.
Sipas dëshmisë së mjekut, mësohet se paratë e grabitura ishin të shtëpisë të cilën e kishte shitur. “Grabitësit kanë qenë të armatosur. Ishin profesionistë”, ka thënë mjeku, i cili i tha policisë se grabitësit e kanë qëlluar, pasi ai rezistoi. “Nga goditja më është mbyllur njëri sy”, ka rrëfyer mjeku për “News 24”. Albrahimi ka qenë më parë edhe drejtor i spitalit të Librazhdit.
