Lidhur me vjedhjen e 250 mln lekë nga makina e biznesmenit Flamur Behi, Gjykata e Tiranës ka dhënë masën e sigurisë “arrest me burg” për Donald Hoxhën dhe Gentian Kanen. Gjatë seancës së sotme gjyqësore, grabitësit kanë deklaruar nuk e dinin shumën që biznesmeni Behi kishte me vete, dhe se ishin habitur edhe vetë nga paratë që kishin gjetur. Në datën 22 maj, kur Behi është paraqitur së bashku me bashkëshorten e tij në ambientet e “Kristal Center”, dy autorët kanë bllokuar me një aparat valët e pultit për mbylljen e automjetit, për të hapur më pas ‘Range Rover’-in.
Policia, pas verifikimeve të kryera për pronësinë e këtij automjeti me të cilin hajduti i çantës është larguar, rezultoi se mjeti ishte në pronësi të Greta Hoxhajt, spikerja e lajmeve në televizionin “Zjarr” në Tiranë. Oficerët e policinë kanë telefonuar Greta Hoxhajn duke i kërkuar kësaj të fundit të paraqitet në polici së bashku me mjetin e saj. Por Hoxhaj, ia ka kthyer oficerëve se ndodhej në qytetin e Fierit dhe se në datën 22 maj makinën e saj e ka përdorur vëllai, Donaldo Hoxhaj. Përmes Donald Hoxhajt është identifikuar edhe i dashuri i gazetares, Gentian Kane. Fillimisht policia ka telefonuar Hoxhajn, por dhe ky person i ka pohuar se ndodhej në Fier, pasi kishte babain sëmurë dhe të shtruar në spital.
Pas kësaj telefonate, Policinë e Tiranës e ka kontaktuar një avokate e cila i ka kërkuar uniformave blu se do paraqitej në polici së bashku me Donald Hoxhajn dhe Gentian Kanen për t’u vetëdorëzuar së bashku me shumën e parave që kishin vjedhur.
