Të lidhur me zinxhirë dhe me izolantë në gojë, banorët e Astirit janë mbledhur sot para Gjykatës së Apelit, e cila do të shqyrtojë ankimimin e 3 protestuesve të arrestuar, për të shqyrtuar masën e sigurisë ‘arrest me burg’.
Banorët, të lidhur me zinxhirë dhe me izolantë në gojë, kanë kërkuar që të lirohen tre të arrestuarit. Një nga banorët e Astirit tha se kjo është një protestë për ti bërë apel gjyqësorit. Qytetari shtoi më tej se personat e arrestuar janë të pafajshëm, dhe se ata duhet lënë të lirë.
“Jemi të lidhur me zinxhirë, si apel ndaj gjyqësorit. 10 protestuesit e parë që u arrestuan në fillim, i liruan. Në komisariatin nr.6, kur u arrestuan policët thanë se ka dhënë urdhër Lleshaj që të arrestohen 10 persona.
Besojmë se Apeli do t’i lërë të lirë. Sot lihen në “arrest shtëpie”, ose “detyrim paraqitje” persona që kanë lidhje me krimin. Nëse nuk lirohen, ne do të bllokojmë rrugën dhe do të protestojnë. Ata janë njerëz të pafajshëm, dhe nuk mund të mbahen të arrestuar”.
