31-vjeçari Gert Shehu, i cili goditi me grusht kryetarin e Partisë Demokratike, Sali Berishën, i është komunikuar masa e arrestit në spital. Ai nuk ka pranuar që të japë deklarime të plota rreth asaj që ka ndodhur ditën e djeshme gjatë zhvillimit të protestës së opozitës. 31-vjeçari ka thënë se “do të flasë në një moment të dytë”.
Gert Shehu, u shpëtoi nga duart truprojave dhe arriti që të godiste me grusht kreun e PD-së, Sali Berisha, teksa ky i fundit po marshonte për në bulevard.
Mbrëmë janë shoqëruar dy truprojat e Berishës, për të dhënë dëshmitë e tyre në lidhje me ngjarjen ku u sulmua ish-kryeministri. Policia i ka dërguar fletë thirrje mbrëmë edhe Berishës, teksa ky i fundit pritet sot që të paraqitet në Drejtorinë e Policisë së Tiranës për të dhënë dëshminë e tij mbi ngjarjen.
Ngjarja ndodhi në rrugën që lidh selinë e Partisë Demokratike me bulevardin “Dëshmorët e Kombit”. Menjëherë kanë ndërhyrë truprojat e Berishës dhe simpatizantët të Partisë Demokratike, të cilët kanë bërë të mundur neutralizimin e 31-vjeçarit.
