Një tjetër bandë droge është goditur në Itali. Mësohet se policia ka vënë në pranga të paktën 20 persona, 12 prej të cilëve janë shqiptarë dhe 8 të tjerët janë italianë. Në mesin e 8 italianëve është edhe një grua. Grupi kriminal operonte në krahinën e Brescia.
Bëhet fjalë për tonelata marijuanë dhe kilogramë kokainë që vinin nga jashtë, me qëllim arritjen e tregut të Breshias në Itali, shkruan “Qui Brescia”.
Pas disa muaj hetimesh, karabinierët të koordinuar nga Prokuroria e Breshias zbatuan 20 urdhër-arreste, mes të cilëve 16 u kapën ndërsa të tjerët janë ende të arratisur.
Është një organizatë kriminale që importonte kokainë nga Holanda dhe marijuanë nga Shqipëria nëpërmjet kanaleve dhe mekanizmave të ndryshëm që nga fundi i vitit 2016. Kështu në “rrjetën e peshkut” përfunduan korrierë e tregtarë të drogës. Nga Holanda shkonin drejt Italisë kilogramë kokaine në çdo udhëtim.
Autoritetet italiane kanë arritur të zbulojnë se si droga vinte nga veriu i Evropës në Breshia me aeroplan, më pas ngarkohej nëpër automjete, madje edhe në kasetefonin e makinave. Pasi mbërrinte në Breshia furnizonte të gjithë tregun. Ndërsa për marijuanën, “QuiBrescia.it” shkruan se vinte nga Shqipëria nëpërmjet skafistëve. Niseshin me gomonet plot dhe mbërrinin në Kalabri, nga ku korrierët e çonin drogën deri në veri të Italisë. TIRANA TODAY
