Gjyshi i Alvin Berishës, Ymer Çira ka treguar arsyet pse vajza e tij, Valbona, nëna e Alvinit, u largua së bashku me djalin e tij, asokohe vetëm 6 vjeç, drejt Sirisë.
Në një prononcim për “Top Channel”, Çira u shpreh se bashkëshorti i vajzës së tij, Afrim Berisha, ka qenë një person problematik në familje. Ndërsa shtoi se ka qenë ai shkaku i largimit të vajzës së tij nga shtëpia.
“Duke krijuar debate mes çiftit ka arritur puna në rrahje, ka arritur puna deri aty sa e ka përzënë nga shtëpia, në një kohë që këta fëmijë kanë qenë shumë të stresuar.
Mendoj unë si prind, që duke pasur eksperiencën e disa herëve të përzëna nga shtëpia, se vajza ka qenë edhe e pjekur dhe për të mos i rënë në qafë prindërve, ka ardhur tek ajo pikë që bëri atë pa marrë lejen e askujt, dhe neve na ka ardhur jashtëzakonisht keq”, tregoi ai, në një lidhje “Skype” nga Gjermania.
I pyetur nëse ka pasur kontakte në kohën që Valbona braktisi bashkëshortin dhe dy vajzat, Ymeri dha këtë përgjigje:
“Kemi pasur vetëm atëherë në fillim dhe i thashe…..qan….pse e bërë ketë….qan… dhe më tha që jo këtu ku jam, por sikur të gjej një cep tjetër në fund të botës, vetëm ai të mos më gjejë asnjëherë. Unë akoma shkoj me iluzionin që vajzën mund ta kem diku. Dhe ishalla është e kësaj natyre.”
Ndër të tjera, ai tregoi që ka plot pesë vjet që nuk e ka parë nipin e tij, Alvinin, si dhe dy vajzat që jetojnë në Itali.
“Alvinin unë nuk e kam parë, ashtu siç nuk e ka parë as Afrimit prej pesë vitesh. Pra, që kur u ndodh atje në Siri, me nënën e tij, me vajzën time. Mirëpo e keqja është, që ashtu siç nuk kam parë Alvinin, unë nuk kam parë as dy vajzat e tjera, këtu në Itali”.
Dëshira më e madhe për Ymer Çirën në këto moment është të takohet me nipin e tij.
“ Kjo do të ishte kënaqësia më e madhe për mua. dhe po të realizohet kjo, ju do ta shini se Alvini do të ketë një kënaqësi shumë të madhe në prehrin tim. Se ai edhe kur vinte në atë moshë, me mua flinte. Me asnjë tjetër. Me ka dashur jashtë mase. Alvini i ka thënë Afrimit, se janë videot, a do më çosh tek gjyshi? Gjyshi i Alvinit që ka bërë ashtu jam unë”.
