Gjyqtarja Enkelejda Hoxha e cila u arrestua bashkë me persona të tjerë si pjesë të një strukture kriminale që synonte të lironte disa të dënuar që e vuajnë dënimin në burgun e sigurisë së lartë në Fushë-Krujë, ka kërkuar pafajësinë.
Procesin gjyqësor në ngarkim të saj, e ka cilësuar si një sulm politik nga kryeministri Edi Rama. Në seancën e sotme në GJKKO, Hoxha tha se hetimi ndaj saj nisi menjëherë pasi u cilësua si monstër nga ana e kryeministrit. Në vijim Hoxha kërkoi pafajësi ndaj akuzave të ngritura ndaj saj.
Gjyqtarja është akuzuar për veprën penale “Korrupsioni pasiv i gjyqtarëve, prokurorëve dhe funksionarëve të tjerë të drejtësisë” dhe rrezikon një dënim me burg nga një vit deri në katër vjet, nëse shpallet fajtore. Në 17 mars, Këshilli i Lartë Gjyqësor vendosi shkarkimin e Hoxhës nga detyra, për lirim në kundërshtim të ligjit të dy të burgosurve.
