Kryetari i Kuvendit, Kadri Veseli nuk ka dëshmuar as sot në seancën gjyqësore ndaj deputetit Albin Kurti, i cili akuzohet për hedhjen e gazit lotsjellës në Kuvend vitin e kaluar.
Shkak për këtë është bërë shtyrja e seancës nga Gjykata Themelore Prishtinë në momentin e fundit.
Kështu, seanca ishte planifikuar të mbahej në orën 09:00, kohë në të cilën Veseli ka shkuar në Gjykatë, por kjo e fundit ka vendosur shtyrjen me një orë për zhvillimin e senacës.
Kabineti i Veselit ka sqaruar se kryeparlamentari kishte planifikuar kohën për këtë seancë dhe ishte i pranishëm në Gjykatë sipas ftesës, duke shtuar se nuk mund të jetë i pranishëm edhe në orën 10:00 për shkak të aktiviteteve dhe agjendës së tij.
“Kryetari i Kuvendit, Kadri Veseli, sipas ftesës, ka qenë sot në ora 9:00 në Gjykatën Themelore në Prishtinë për të marrë pjesë në seancën gjyqësore për deputetët që kanë hedhur gaz lotsjellës vitin e kaluar. Ora 09:00 kryetari Veseli është njoftuar se seanca nuk ishte në ora 9:00, por është shtyrë për në ora 10:00. Për shkak të ndërrimit të kohës së seancës, pa njoftim paraprak, dhe agjendës së planifikuar më herët, në takime dhe aktivitete të tjera ditore, ai e ka të pamundur të merr pjesë në seancë gjyqësore. Kryeparlamentari Veseli ashtu siç ka deklaruar edhe më herët, është i hapur që të bashkëpunoj me sistemin e drejtësisë lidhur më këtë rast që po gjykohet, dhe do t’i përgjigjet ftesës edhe herave të tjera, siç ka bërë edhe sot”, thuhet në deklaratën e kabinetit të kryeparlamentarit Kadri Veseli.
