Gjykata e Arbitrazhit në Uashington ka pranuar kërkesën e Shqipërisë, për anulimin e vendimit të marrë në prill nga kjo gjykatë, në favor të sipërmarrësit italian Francesco Becchetti. Gjykata Ndërkombëtare e Arbitrazhit gjobiti Shqipërinë me 110 milionë euro, për konfliktin me biznesmenin italian, Francesco Becchetti.
Ky pezullim, i cili është provizor, vjen pas ankesës së qeverisë shqiptare ndaj vendimit të Gjykatës Ndërkombëtare të Arbitrazhit për konfliktet e investimeve (ICSID), që i faturoi Shqipërisë në prill të këtij viti, gjobën më të madhe në historinë e shtetit shqiptar.
Pas pranimit të kërkesës së Avokaturës së Shtetit për anulimin e gjobës në datën 27 gusht, Sekretari i Përgjithshëm i kësaj Gjykate ka njoftuar të dy palët e përfshira në konflikt, qeverinë shqiptare dhe biznesmenin Becchetti, për pezullimin e përkohshëm të ekzekutimit të sanksionit ekonomik.
