Gjykata e Apelit Administrativ ka rrëzuar dy vendimet e Ministrisë së Brendshme për dëbimin e gylenistit, Selami Simsek.
Sipas Apelit, procedura e Ministrisë së Brendshme për dëbimin e Simsek është e pavlefshme. Pas rrëzimit të vendimit nga Apeli Administrativ, Selami Simsek ka të drejtë të aplikojë sërish për azil politik në vendin tonë.
Simsek është konsideruar nga Presidenti turk, Rexhep Taip Erdogan, si pjesë e gylenistëve që organizuan grushtin e shtetit në Turqi në korrik 2016. Ai u arrestua më 8 korrik të 2019-ës, për falsifikim dokumentash.
Simsek tentoi që të largohej drejt Kanadasë me dokumenta të falsifikuara nëpërmjet aeroportit të Rinasit. Gjatë arrestimit, atij iu sekuestra pasaporta false. Së bashku me të, u arrestua edhe mësuesi Harun Çelik, i cili u ekstradua drejt Turqisë.
