Padia e kryetarit të Bashkisë së Durrësit, Vangjush Dako ndaj kryetarit të Partisë Demokratike, Lulzim Basha është konsideruar jo e drejtë nga Gjykata e Tiranës.
Kujtojmë se kryebashkiaku i Durrësit e kishte paditur për shpifje kryetarin e Partisë Demokratike për deklaratat se “Vangjush Dako është kapur në përgjim duke bashkëpunuar me krimin e organizuar dhe se është nën hetim nga Krimet e Rënda”.
“Kam vendosur ta çoj në gjyq Lulëzim Bashën, si një shpifës profesionist që e ka kaluar cakun e tolerancës time. Ky njeri që gënjen sy për sy kë t’i dalë përpara, një i paaftë që si kryetar bashkie la kokrrën e namit me paaftësinë e me gënjeshtrat e tij dhe si kryetar i opozitës e ka bërë qesharake Partinë Demokratike, duhet të përgjigjet përpara drejtësisë për shumë gjëra. Por nëse për ato të rëndat fare me dëme ekonomike kolosale, do t’i japë patjetër përgjigjet e veta përballë institucioneve të reja të reformës në drejtësi që ai po bën çmos ta bllokojë, me mua do të përballet e do të përgjigjet përpara gjykatës për shpifjet e tij prej mashtruesi profesionist”, deklaroi Vangjush Dako në kohën kur dorëzoi kërkesë-padinë.
