Ish-kryeministri Sali Berisha ka reaguar sa i takon vendimit të Gjykatës së Apelit, për të pranuar ankesën e Enkelejd Alibeajt për njohjen e statutit të Komisionit të Rithemelimit. Ai e ka cilësuar këtë vendim si një akt të shëmtuar, ndërsa ka përsëritur akuzat për ndikim nga jashtë edhe për ambasadoren Yuri Kim, për të cilën tha se do të informojë Departamentin Amerikan të Shtetit.
“Një gjykatëse vendosi dje të shkruaj ligjin e shtetit, në një akt që tejkalon çdo imagjinatë, në një presion të tmerrshëm, ndaj të cilit një njeri që ka minimumin e karakterin nuk i lejon vetes akte të tilla.
Është po kjo gjykatëse, nuk ka pranuar ankesën tonë. Ajo shkroi ligjin në aktin më të shëmtuar të CV-së të saj. Ky revolucion nuk ndalet për asgjë. Nuk besoj se ka patur një shkelje më të rëndë mbi vlerat e lirisë mbi të cilat qëndrojnë SHBA. Nuk besoj kurrë se ky është një orientim, një parim i vendit të saj. Ky është një akt individual, do informojmë autoritetet e SHBA”, tha Berisha.
Gjykata e Rrethit Gjyqësor të Tiranës do të shqyrtojë ankimin e kreut të komanduar të Partisë Demokratike, Enkelejd Alibeajt, i cili kërkon shfuqizimin e vendimit të 25 marsit të marrë nga gjyqtari Agron Zhukri, për regjistrimin e Kuvendit të 11 dhjetorit 2021, vendimeve të tij dhe njohjen e Komisionit të Rithemelimit të PD.
Në njoftimin e gjykatës së kryeqytetit bëhet me dije gjithashtu se kundër vendimit të djeshëm nuk mund të bëhet ankim. Gjyqtarja Blerina Muça miratoi marrjen në shqyrtim të ankimit të PD zyrtare kundër Komisionit të Rithemelimit të PD. Në këtë mënyrë, ish-kryeministrit Sali Berisha dhe “Foltores” nuk u jepet e drejta që të kërkojnë rrëzimin e kërkesës së Alibeajt, për të pushuar vendimin e 25 marsit ose rishqyrtimin e këtij vendimi me një trupë të re gjykuese. Pritet që shkalla e Apelit e Gjykatës së Rrethit Gjyqësor Tiranë, të japë vendimin përfundimtar për Kuvendin e 11 dhjetorit 2021. Për seancën e radhës, ende nuk është përcaktuar data nga ana e institucionit gjyqësor të kryeqytetit. Në këtë mënyrë, legjitimiteti ose jo i Komisionit të Rithemelimit të PD, si organi drejtues i partisë më të madhe opozitare duhet të presë fjalën përfundimtare të drejtësisë.
Përfaqësuesi ligjor i Komisionit të Rithemelimit të PD, Ivi Kaso, deklaroi për mediat se nuk është dhënë vendim nga Gjykata e Rrethit Gjyqësor të Tiranës për çregjistrimin e Kuvendit të 11 dhjetorit 2021. Ai theksoi se vendimet e këtij Kuvendi janë regjistruar në dosjen gjyqësore, dhe është e pamundur të mos njihen.
