Gjykata Speciale është kthyer në një makth për të gjithë politikanët në Kosovë. Presidenti i Kosovës Hashim Thaçi, në një intervistë për gazetën “Epoka e Re”, ka ritheksuar se e mbështet iniciativën e deputetëve për shfuqizimin e Gjykatës Speciale.
Pas intervistës në Radio Evropa e Lirë, Thaçi ka përsëritur po të njëjtin konstatim edhe në intervisatë për median kosovare, se ai do të votojë këtë çështje, ashtu siç ka votuar edhe ligje të tjera.
Thaçi ka vlerësuar me bindje se prej këtyre iniciativave nuk duhet të frikësohet askush, por duhet të mbështeten.Ai tha se veprimet ligjore dhe kushtetuese mund të jenë të papëlqyeshme apo zhgënjyese, por nuk i cenojnë raportet me SHBA-në, BE-në dhe NATO-n.
I pari i Kosovës, Hashim Thaçi ka theksuar se Gjykata Speciale është një padrejtësi historike, por e ka shtyrë përpara për shkak të ruajtjes së partneritetit me Shtetet e Bashkuara të Amerikës, Bashkimin Evropian dhe Aleancën Atlantike të Veriut. Më tej ai shtoi se krijimi i speciales më tepër është një lojalitet i Kosovës ndaj propozuesve sesa ka qenë i nevojshëm me bindjet se duhet të ndodhë diçka e tillë.
Ai la të kuptohet se ky lojalitet i treguar nga ana e Kosovës ndaj partnerëve, nuk duhet të keqpërdoret dhe duhet trajtuar me një delikatesë të posaçme.
