Banorët e Beratit janë ngritur në protestë ditën e sotme, pas vendimit të djeshëm të Gjykatës Administrative Tiranë, e cila rrëzoi VKM-në për shpalljen e Malit të Tomorrit “Park Kombëtar”.
Protestës së tyre iu është bashkuar edhe ministri i Turizmit, Blendi Klosi, si dhe drejtues të pushtetit vendor.
Me pankartat në duar: “Mos ma prek Tomorrin”, “Tomorri park natyror”, “Do ju përgjigjet vettingu dhe Abaz Aliu”, “Jo shkatërrimit të malit” etj, banorët kanë kërkuar rrëzimit e vendimit të Gjykatës Administrative.
Ndër të tjera, ministri Klosi u shpreh se dënon vendimin e djeshëm, ndërsa u shpreh që sipas tij, ata duan të mbrojnë interesat e një komuniteti të vogël, që janë ata biznesmenët e gurit.
“Të gjithë ata biznesmenë janë në shkelje të ligjit sepse ata s’kanë zbatuar koordinatat, askush nuk e ka ripyllëzuar zonën e dëmtuar, ata nuk e kanë zbatuar kontratën me shtetin dhe për këtë iu është revokuar leja.”
Po ashtu, Klosi deklaroi nga Berati se “do ta rrëzojë vendimin që morën 5 gjyqtarët e Gjykatës Adminiatrative, që votuan 4 pro dhe 1 kundër për rrëzimin e VKM-së për Malin e Tomorrit. 4 gjyqtarët; Amarildo Laçi, Bari Shyti, Arkelino Gazidede dhe Fjoralba Shehu do të përballen me peticionin e qytetarëve të të gjithë qarkut të Beratit. Do të vazhdojmë të kërkojmë që të firmoset peticioni jonë dhe do ta ankimojmë vendimin e Administratives në Gjykatën e Lartë”.
