Gjykata e Tiranës ka lënë në fuqi masën “pezullim nga detyra” për Presidentin e Federatës Shqiptare të Futbollit, Armand Dukës, sekretarin e përgjithshëm të Shoqatës, Ardian Haçit dhe sekretarin e FSHF-së Ilir Shulkun. Asnjëri nga të tre të pezulluarit nuk janë paraqitur në gjykatë, dhe kanë deklaruar se do të përfaqësohen nga avokatët e tyre. Duka, Haçi dhe Shulku janë pezulluar për shkak të akuzave për “falsifikim dokumentesh”. Avokati ka thënë se një person politik, nuk duhet të marrë pjesë në sport.
Debatet në seancë:
Prokurori: Është nisur hetim lidhur me një sërë parregullsish të dyshuara si të konsumuara në mbledhjen e datës 24 janar. Pas adminstrimit të vendimit “pezullim nga detyra”, Prokuroria e ka zbatuar masën përmes policisë gjyqësore duke i njoftuar shtetasit.
Vendimi iu është bërë me dije personave. Ne si Prokurori kërkojmë vijimin e masës së sigurimit “ndalim i përkohshëm i ushtrimet të detyrës”.
Avokati Julian Mërtiri, përfaqësues ligjor i Dukës, Haçit dhe Shulkut: “Prokuroria pretendon se ka dyshime se Duka, Haçi, Shulku dhe Kokëdhima kanë konsumuar vepra të “shpërdorimit të detyrës” dhe “falsifikimit të dokumenteve”.
Sqarojmë gjykatën se Shoqata Rajonale Tira funksion si OJF. Provat provojmë tej çdo dyshimi se nuk ekzistojnë veprat penale, për të cilat ka ngritur dyshime Prokuroria.
Gjithë mbledhja është regjistruar me pamje filmike, të cilat i janë vënë në dispozicion Prokurorisë. Procesi ka qenë tejet transparent, dhe sipas kërkesave ligjore.
Presidenti i FSHF nuk ka asnjë ndikim tek Shoqata. Duka nuk ka asnjë kompetencë tek Shoqata. Gjithë procesi organizativ i Shoqatës, është regjistruar nga vetë organizatorët.
Prokuroria ka anashkaluar faktin që këta persona nuk janë të pandehur, por vetëm persona nën hetim. Të përfaqësuarit prej meje, nuk ushtrojnë funksione publike. Haçi është sekretar i përgjithshëm i Shoqatës, që nuk është institucion shtetëror.
Po ashtu, FSHF nuk është institucion shtetëror. I njëjtë është argumenti edhe për Shulkun.
Ligji për sportin ndalon ndikimin e politikës në sport. Institucionet publike duhet të shesin aksionet e tyre, në respekt të ligjit për sportin. Kallëzuesi, Veliaj, në rolin e aksionarët, është politikan, dukë krijuar kështu kundërshti ligjore. Shoqata Rajonale e Futbollit Tiranë nuk ushtron ndonjë funksion publik”.
