Gjykata e Fierit ka dhënë masën e sigurisë për një nga autorët që mbeti i plagosur nga policia gjatë tentativës për të grabitur në një banesë në Fier.
Gjykata ka dhënë masën ‘arrest në burg’ në mungesë për Arben Muçën, i cili ndodhet në spitalin e Fierit. Ai u përfaqësua nga avokati Ardjan Abazi, i cili tha se klienti ti tij nuk mbante mend asgjë.
“Nuk mbaj mend gjë, jam i shokuar”- ka thënë 37-vjeçari.
Mësohet se Muça nuk ka pranuar të flasë gjatë marrjes në pyetje nga grupi hetimor. Prokurori i çështjes Çlirim Sino ka kërkuar arrest në burg pa afat që është caktuar edhe nga gjyqtarja Igerta Hysa.
Ngjarja e rëndë ndodhi rreth orës 02:30 në lagjen ‘29 Nëntori’ në Fier 4 grabitësit kishin shkuar për të grabitur në apartamentin e Minella Muçit. Pas dështimit të tentativës për të shqyer derën grabitësit janë përplasur me armë me policinë ku si pasojë ka mbetur i vdekur një prej tyre dhe tjetri, 37-vjeçari Arben Muçaj nga Puka me banim në Ndroq ka mbetur i plagosur.
Autorët e grabitjes në Fier kanë tentuar të hapin dyert e dy banesave, të Minella Muçit dhe të një fqinjit të tij. I plagosuri Arben Muçaj ka qenë tek hyrja me kallashnikov dhe ka qëlluar i pari policinë. Më pas ka zbritur personi që u vra me dy pistoleta duke qëlluar edhe ai kundër policisë. Në këtë moment policia ka qëlluar kundër tij dhe ka mbetur i vdekur në vend Xhuliano Sollaku.
