Trajneri i Kombëtares shqiptare ka humbur në Shkallën e Parë një betejë ligjore të nisur me ish-presidentin e Republikës së Shqipërisë, Bujar Nishani.
Christian Panuçi iu drejtua gjykatës me një kërkesëpadi, e cila është bazuar në nenet 608 dhe 654 të Kodit Civil. Në atë kërkesë, italiani është shprehur se i është cenuar nderi, personaliteti dhe reputacioni dhe kësisoj kërkoi një përgënjeshtrim dhe shlyerjen e dëmit pasuror nga ana e Nishanit.
REAGIMI – Në lidhje me këtë çështje dhe vendimin e marrë së fundmi nga Gjykata e Tiranës, e cila ka rrëzuar kërkesën e italianit, gazeta “Panorama Sport” ka kontaktuar me vetë trajnerin e Kombëtares së futbollit. I pyetur në lidhje me vendimin e dhënë nga trupa gjykuese, trajneri i përfaqësueses është shprehur. “Kanë konfirmuar ofendimet ndaj meje, por gjithsesi… nuk ia vlen”, tha fillimisht trajneri i Kombëtares.
