Gjykata e Tiranës ka regjistruar ndryshimin e emrit të Lëvizjes Socialiste për Integrim në Parti të Lirisë. Gjykata e Tiranës ka regjistruar ndryshimet në strukturat drejtuese, duke njohur si kreun e grupit të punës kryetar ish-presidentin Ilir Meta dhe zëvendës kryetar Agim Neshon. Me ndryshimet statutore dhe pranimin në gjykatë, nga sot LSI është zyrtarisht Partia e Lirisë, ndryshime të cilat i janë përcjell edhe KQZ-ja si subjekt i interesuar.
Një ditë pasi la postin e Kreut të Shtetit, Ilir Meta u rikthye sërish në jetën aktive politike, duke rimarrë drejtimin e partisë së tij LSI-së. Meta mbajti konventë kombëtare të LSI-së, ku u vendos që partia të mbajë emrin Partia e Lirisë.
Që në nisje të eventit u ndryshuan dy nene në statut, ku LSI-ja i dha të drejtë vetes që të ndryshojë emrin, vulën dhe simbolet e partisë. Kjo i hapi rrugën ndryshimit të emrit të partisë së krijuar në vitin 2004 nga Ilir Meta.
