Ambasadorja Yuri Kim ka reaguar pasi Presidenti Ilir Meta dekretoi gjyqtarin Sokol Ngresi, si anëtar të Gjykatës së Lartë. Bashkë me Ngresin, Gjykata e Lartë bëhet me 13 anëtarë nga 19 anëtarë që duhet të ketë në total. Me emërimin nga Presidenti të gjyqtarit Sokol Ngresi, plotësohet kuorumi për tu mbledhur dhe për të gjykuar në Kolegjet e Bashkuara. Gjykata e Lartë, pas 5-vitesh në pamundësi për ta ushtruar këtë funksion themelor të saj, nga sot mundet të ndryshojë/unifikojë praktikën gjyqësore. Ambasadorja Yuri Kim e cilëson si një hap të madh për Reformën në Drejtësi. Duke qëndruar në të njëjtën linjë, ambasadorja thekson se Gjykata e Lartë tani është në gjendje të kryejë të gjitha funksionet, të shqyrtojë më shumë raste dhe të ndryshojë ligjet gjyqësore në mënyrë racionale.
“Hap i madh përpara për Reformën në Drejtësi: Gjyqtari i 13-të i Gjykatës së Lartë u dekretua sot, duke i dhënë mundësi dhomave të bashkuara të arrijnë përfundimisht kuorumin pas 5 vitesh.
Kjo do të thotë se Gjykata e Lartë tani është në gjendje të kryejë të gjitha funksionet, të shqyrtojë më shumë raste dhe të ndryshojë ligjet gjyqësore në mënyrë racionale.
Ky hap i madh është falë bashkëpunimit të mirë mes institucioneve të drejtësisë dhe Presidencës. Shpresojmë që kjo të vazhdojë. Reforma në Drejtësi nuk ka qenë e lehtë, e shpejtë apo e përsosur, por përfundimisht po ecën përpara dhe po prodhon rezultate reale”, shkruan Yuri Kim në Twitter.
