Pasi gjykata e Durrësit ka lënë të lirë të ashtuquajturin baronin e drogës, Alket Hatijan, Gjykata e Apelit ka rrëzuar këtë vendim. Ajo ka caktuar masën e sigurisë “arrest në burg”, ndërkohë që Hatija ka qenë i dënuar me 20 vjet burg nga drejtësia italiane.
Prokuroria e Durrësit ankimoi vendimin e gjykatës së shkallës së parë të Durrësit si absurd e të pabazuar ligjërisht. Vendimi u ankimua pjesërisht edhe nga vetë Alket Hatija, i cili pretendoi se është dënuar për të njëjtën vepër penale nga Gjykata e Krimeve të Rënda në vitin 2010 dhe e ka vuajtur plotësisht dënimin prej 10 vjet e 8 muaj burg. Në shtator 2015, Gjykata e Apelit në Milano e ka dënuar me 20 vjet burgim për trafikim të paligjshëm të drogave, të kryer në vitet 2003-2004 në bashkëpunim me 40 shtetas të tjerë.
Të dy ankimimet janë shqyrtuar në një seancë të vetme, nga trupi gjykues i Apelit, kryesuar nga Arjan Balliu, i cili konstatoi se “ka dyshime të arsyeshme të bazuara në prova se Alket Hatija nuk është dënuar për të njëjtën periudhë të veprimtarisë kriminale dhe me po të njëjtët bashkëpunëtorë nga gjykata shqiptare dhe ajo italiane”, siç pretendon.
Ndaj gjykata e Apelit çmoi se gjykata e shkallës së parë ka zbatuar gabim ligjin dhe duhet të ndryshojë vendimin e saj duke miratuar “Arrestimin e përkohshëm “ të Hatisë më 8 korrik dhe caktuar si masë sigurimi atë të “Arrestit në burg”.
Ndërkohë KLD ka kërkuar një hetim disiplinor ndaj gjyqtarit Petraq Curri që urdhëroi lirimin e Hatijajt. Më 17 korrik, Ministria e Drejtësisë ka autorizuar mbajtjen/aplikimin e masës shtrënguese dhe vendosjen e masës së sigurimit personal ndaj shtetasit Alket Hatija, që aktualisht është i lirë.
