Gjykata e Krimeve të Rënda ka dënuar me 15 vite burg Kelmend Balilin, por ai do të vuajë vetëm 10, pasi më herët organi i drejtësisë ka pranuar gjykimin e shkurtuar.
Më 8 prill, Prokuroria kërkoi 18 vite burg në total për Balilin, por mesditën e së martës, pasi u dëgjuan edhe pretendimet e mbrojtjes, Gjykata e Krimeve të Rënda vendosi dënimin me 15 vite burg për Kelmend Balilin, i etiketuar edhe si Eskobari i Ballkanit. Vendimin Balili ka preferuar të dëgjojë vetë, duke qenë i pranishëm në sallë.
Për të katër akuzat, trafik droge në bashkëpunim, pjesëmarrje në grup kriminal, fshehje të ardhurash dhe pastrim parash, Balili i kundërshtoi vetëm me një fjali: “nuk kam kryer asnjë vepër penale në jetën time”.
Prokuroria kërkoi 18 vite heqje lirie për Balilin. Gjykata vendosi 15, por duke qenë se çështja trajtohej me gjykim të shkurtuar, ai u dënua përfundimisht me 10 vjet burgim.
“14 vite burg për akuzën e trafikut të lëndëve narkotike, 2.6 vite burg për akuzën e grupit kriminal, 6 muaj për fshehje pasurie dhe 5 vjet per pastrim parash. Në total Kelmend Balili dënohet me 15 vite burgim dhe me aplikim të gjykimit të shkurtuar, Balili dënohet me 10 vjet burgim”, u shpreh trupi gjykues.
Si prova fajësie u renditen përgjimet telefonike të realizuara nga autoritetet greke, në kuadër të një hetimi që po kryhej atje.
Në sallë ishin të pranishëm edhe familjarët e të pandehurit. Kelmend Balili u vetëdorëzua në janar të këtij viti, pas dy vitesh arrati.
