Ish-ministrja e Integrimit dhe ish-deputetja e LSI-së Klajda Gjosha përgjatë një deklarate mediatike theksoi se për një Shqipëri evropiane duhet pakt kombëtar.
“Për një Shqipëri evropiane duhet pakt kombëtar. Që prej datës 18 tetor vendi ynë është përfshirë në një debat të brendshëm mbi arsyet e mos çeljes së negociatave.
Debat i cili jo vetëm nuk e ndihmon Shqipërinë në perspektivën e saj evropiane, por e rëndon edhe më tepër pozicionin tonë për një vendimmarrje të pritshme në mbledhjen e radhës të Këshillit Evropian, që parashikohet të ndodhë në muajin maj të 2020-ës.
Sado arsye të mundohemi të gjejmë për situatën e brendshme të vetë BE-së, kërkesat e Francës për reformim të brendshëm apo balancën e pushteteve mes vendeve të BE-së dhe institucioneve të saj, askush nuk mund të thotë sot se Shqipëria ka shkëlqyer në detyrat e saj.
Por asnjë prej këtyre diskutimeve nuk zgjidh ngërçin institucional, kushtetues dhe politik që ka mbërthyer vendin.
Asnjë diskutim nuk rikthen dot shpresën e qytetarëve që vazhdojnë të largohen në masë çdo ditë.
Asnjë hedhje faji mbi Francën dhe Holandën nuk na bën ne më pak fajtor për gjendjen e mjerueshme në të cilën ndodhet vendi, që nga kuadri i mosfunksionimit të demokracisë e deri te rrënimi ekonomik që ka ardhur nga koncesionet e panumërta dhe PPP-të që rrisin çdo ditë borxhin publik”, deklaroi Gjosha.
