Një 25-vjeçar kinez, i shpallur në kërkim ndërkombëtar, u arrestua ditën e djeshme në Rinas nga Policia Kufitare në bashkëpunim me Interpol Tiranën.
I arrestuari identifikohet si Guanghui Lai, i cili sapo zbriti nga avioni që vinte nga Turqia, ku kishte bërë transitin, ra në prangat e Policisë Kufitare të Rinasit.
Shtetasi kinez, është pjesë e një grupi kriminal të tipit mafioz, të cilët merrnin përfitime ekonomike nëpërmjet dhënies me kamatë, hapjes së kazinove, kumarit dhe marrjes me dhunë të borxheve.
Në vitin 2013, ky shtetas, së bashku me pjesëtarë të tjerë të grupit, kanë rrëmbyer shtetasin me iniciale X.L., duke e detyruar atë të ripaguajë një borxh në vlerën e 3.8 milionë yuan kinezë.
Ndërsa, në vitin 2014, në të njëjtën mënyrë, i riu ka detyruar shtetasin me iniciale W.H., që të paguajë një hua duke e detyruar atë të shesë 23 suita, 40 vendparkime dhe 6 automjete me çmim shumë të ulët.
Sipas ligjit kinez parashikohet maksimumi i dënimit deri në 10 vite burg.
