Në ambientet e “Hotel Tiranës” u zhvillua tryeza e bashkëbisedimit mes drejtuesve të Federatës Shqiptare të Futbollit dhe prindërve e trajnerëve, në eventin “Gjithçka për fëmijët”. Në këtë takim ishin të pranishëm edhe sekretari i përgjithshëm i FSHF-së, Ilir Shulku, dhe ambasadori i “Grassroots” për Shqipërinë, Lorik Cana. Futbolli te fëmijët ishte tema e kësaj tryeze bashkëbisedimi të Federatës Shqiptare të Futbollit, që prezantoi edhe projektin e saj të ri “Grow”.
Presidenti Armand Duka tha në fjalën e tij se institucioni që ai drejton ka si priortitet zhvillimin dhe edukimin e fëmijëve të grupmoshës 7-9 vjeç. Ai theksoi se FSHF-ja do të krijojë një sistem licencimi për moshën 7-vjeçare.“Në fillim te sezonit prezantuam projektin “Topi Yt”. Jemi e vetmja federatë që e kemi ndërmarrë një gjë të tillë. Një projekt tjetër pilot është “Grassroots”. Sot futboll luajnë 7 mijë fëmijë. Me një sistem licencimi nuk zgjidhet gjithçka. Ne marrim një lloj “feedback”-u nga prindërit, çfarë duhet të përmirësojmë dhe ku është më e nevojshme”.
Ndërsa ish-kapiteni i Kombëtares shqiptare, Lorik Cana tha se një nismë e tillë do të mundësojë krijimin e një të ardhmeje të ndritur për fëmijët. Tryeza e bashkëbisedimit “Gjithçka për fëmijët” do të pasohet edhe me ngjarje të tjera dhe do të shtrihet në të gjithë Shqipërinë. “Përgëzoj nisjen e këtij bashkëbisedimi jo vetëm për futbollin, por për shoqërinë tonë dhe fëmijët. Sporti dhe futbolli kanë nevojë për përmirësim. Kemi patur një histori të gjatë bashkë. Sporti dhe futbolli ballafaqohen me problemet që kemi ne si shoqëri. Një shoqëri që është anashkaluar. E rëndësishme është të investojmë te moshat e reja. E kam pranuar me kënaqësi angazhimin si ambasador i “Grasroots”.”
Kjo tryezë do të pasojë me shumë evente të tjera, si në shkolla, por nuk do të ndalet vetëm në Tiranë, por do të shtrihet në të gjithë Shqipërinë në bashkëpunim edhe me Ministrinë e Sporteve.
