Gjatë viteve të fundit raportohet se kontratat e dhëna me koncesion kanë shfaqur problematika të shumta. Ndër më të debatuarat kanë qenë ato të dhëna në sektorë “sensitivë” si energjia, transporti apo shëndetësia.
I gjithë thelbi i këtyre problematikave në vite ka qëndruar në mënyrën se si janë hartuar plan-bizneset, se sa serioze janë kompanitë në studimet që bëhen, se sa të sakta janë këto projekte, pasi në shumë prej tyre problem vazhdon të mbetet financimi i tyre.
Por nisur nga të dhënat në 13 vite, më konkretisht nga viti 2004 kur është dhënë dhe koncensioni i parë dhe deri në 2017, rezultojnë 172 kontrata të lidhura me shtetin shqiptar. Ndërsa referuar këtyre të dhënave, kontratat në bazë të veprimtarisë, vendin kryesor e zë energjia dhe gazi, me 143 kontrata, më pas vjen sektori i transportit me 15 kontrata, kontrolli fiskal 5 kontrata, mjedis 4 kontrata, punë të brendshme 3 kontrata, ndërsa sektorët e shëndetësisë dhe bujqësisë me nga 1 kontratë.
Rritja e numrit të objekteve dhe shërbimeve publike të dhëna me koncesion në vitet e fundit është bërë objekt debatesh lidhur me kostot që kjo strategji po sjell për buxhetin e shtetit, por edhe të individëve dhe bizneseve.
