Shkolla në Finlandë është pa pagesë. Librat janë falas, ekskursionet dhe ushqimi gjithashtu. Për nxënësit që jetojnë më larg se 2 km nga shkolla, shteti ka vënë në dispozicion autobuzët. Ndërsa në Shqipëri, qeveria jep për arsimin vetëm 3.1 për qind e PBB, në Finlandë kjo shifër arrin në 12.2 për qind.
Çdo fëmijë, bën në shkollë detyra me kërkesa të ndryshme, sipas aftësive individuale. Ndryshe nga shumë vende të botës, notat nuk janë publike. Madje deri në klasën e III, nuk ka fare nota. Kjo mendohet se i shërben motivimit më të mirë të nxënësve. Në shkollat finlandeze, nuk ka uniforma, dhe fëmijët mund të vishen si të duan.
Ata madje mund të qëndrojnë si të duan, ulur ose shtrirë. Nuk u jepen detyra shtëpie, ose nëse po, kjo lidhet me aspekte interesante mbi familjen e tyre. Fëmijët finlandezë, nuk iu nënshtrohen testimeve, pasi sistemi bazohet në parimin:“përgatitemi për jetën, jo për provimet”. Testimit i nënshtrohen vetëm 16-vjeçarët, në fund të shkollës së mesme. Mësuesit finlandezë janë tejet të motivuar në punën e tyre. Kjo shpjegohet edhe nga paga e tyre, mesatarisht 3500 euro në muaj.
