Beteja me koronavirusin do të zgjasë, ndaj na duhet që të presim deri në verë. Walter Ricciardi, anëtar i ekzekutivit të Organizatës Botërore të Shëndetit (OBSH), dhe këshilltar i Ministrisë së Shëndetësisë në Itali tha se kjo ‘luftë’ do të zgjasë për një kohë të pacaktuar.
“Lufta kundër koronavirusit nuk do të jetë e shkurtër” dhe se “është mirë që fillojmë të përgatitemi për një luftë të gjatë, e cila, nëse i referohemi epidemisë së SARS e cila ishte më pak ngjitëse, përfundoi rreth muajve maj-qershor. Koronavirusi është shumë më ngjitës sesa SARS, dhe kam përshtypjen se nëse ne të gjithë do të punojmë së bashku, mund t’i japim fund luftës në muajin korrik. Do të jetë e nevojshme të presim përpara se të kthehemi në jetën normale”.
Sipas Walter Ricciardi, referuar rritjes së rasteve në Itali, do të duhet të presin edhe dy javë. “Do të duhet të presim të paktën dy javë për të parë një ulje të infeksioneve. Këtë javë ato do të vazhdojnë të rriten; pastaj shpresojmë të stabilizohet. Por mbi të gjitha do të shohim që vendet e tjera europiane do të gjenden në situatën në të cilën ndodhet Italia”.
Qeveria italiane vijon me menaxhimin e situatës, duke shpallur masa të reja të forta për të sfiduar koronavirusin. Italia është në izolim kombëtar, si shkak i koronavirusit ku numri i viktimave sa vjen dhe rritet çdo ditë e më tepër. Kina ishte vendi i parë në botë i prekur nga koronavirusi, pasi atje shpërtheu për herë të parë. Në Europë Italia është vendi më i prekur.
