Ish-ministri i Mbrojtjes Arben Imami ka treguar se si qëndron marrëdhënia e tij me kreun e PD-së, Lulzim Basha dhe mendimet që ka për gjendjen ku ndodhet partia.
Teksa ka folur në “Kjo Javë” në News 24 Imami e ka quajtur të paaftë kreun e Partisë Demokratike. Sipas tij, ai është fajtori i drejtpërdrejtë për humbjen katastrofike në zgjedhjet e 25 qershorit.
Ish-ministri deklaroi se nga sondazhet e kryera tregojnë qartë se PD-ja është në rënie të vazhdueshme pasi vetë Basha nuk ka popullaritet. Gjithashtu Imami theksoi se menjëherë pas zgjedhjeve, Basha si humbës i “madh” duhet të ishte larguar nga PD-ja.
“Ky njeri është i paaftë. Këtë mendim që kam unë nuk e kanë të gjithë në Partinë Demokratike. Lulzim Basha ka një popullaritet të ulët, ndërsa partia me në krye Bashën po shkon në rënie. Këtë e kanë treguar sondazhet, kush nuk iu beson sondazheve është i verbër dhe naiv. Basha na ka paraqitur konkluzione që ne i dimë. Rruga e zgjedhur nga Basha mua nuk më bind. Përgjegjësitë e humbjes katastrofike në zgjedhje, i takojnë një njeriu dhe ai është Luzim Basha. Pas humbjes së zgjedhje Basha duhet të jepte dorëheqjen”-deklaroi Imami.
