Nënkryetari i dorëhequr i PD-së, Agron Gjekmarkaj, teksa ka qenë mbrëmjen e djeshme i ftuar në emisionin “Opinion”, tha se kishte pritshmëri që nga zgjedhjet e pjesshme lokale të 6 Marsit, PD të dilte forcë e dytë. Sa i takon dorëheqjes së tij, ai thotë se ishte një akt përgjegjësie.
“Përgjegjësia është etike dhe morale, se sa përgjegjësi reale politike. PD, ne dolëm të tretët dhe ishte befasues si rezultat. Nuk e prisja. Prisja vendin e dytë dhe mendoja si do artikuloja për të justifikuar vendin e dytë, ç’ka më dukej edhe normale.
E bëra këtë akt duke lexuar vullnetin e shumicës, dhe duke pasur parasysh se ligjërimi im i këtyre muajve, për të cilin unë nuk kam pendesë dhe i rri ligjërimit që kam patur, nuk u lexua ashtu siç unë dëshiroja nga elektorati.
Në demokraci vendosin numrat, vendos shumica. Tani unë jam pakicë në mendim, ndaj bëra aktin e dorëheqjes dhe si akt përgjegjësie. Ftova dhe të tjerë të reflektojnë, ta bëjnë këtë. Të parin kryetarin e PD, zotin Basha dhe kushdo tjetër që e ndjen këtë përgjegjësi. Por kjo nuk do të thotë që unë nuk do të mbroj idetë e mia, ashtu siç i kam patur”, u shpreh ai.
Deputeti i Qarkut të Lezhës ka dhënë dorëheqjen nga çdo post në parti, por do të vazhdojë të mbajë mandatin. Agron Gjekmarkaj i afruar në PD në zgjedhjet e fundit parlamentare, mban postin e përfaqësuesit politik në Qarkun e Lezhës. Këtë pozicion ai e mori pas dorëheqjes së Mark Markut, i cili dorëzoi mandatin e deputetit në shenjë revolte për zhvillimet brenda PD-së pas humbjes më 25 Prill.
Gjekmarkaj gjithashtu në janar 2022 u emërua nga Basha si nënkryetar i PD-së pas ristrukturimit të kupolës drejtuese ku Alibeja u bë kryetar grupi në vend të Alfred Rushajt.
Dorëheqja e tij vjen pas zgjedhjeve të pjesshme të mbajtura në 6 Bashki të vendit, ku PD në 5 prej tyre doli forcë e tretë pas 12 vitesh në opozitë.
