Është një perspektivë e zymtë të mendohet se imuniteti i tufës, mund t’i japë fund pandemisë së koronavirusit. Nëse do të arrihej vërtet imuniteti i vërtetë, koronavirusi nuk do të përhapej më, dhe ne mund të rikthehemi në jetën normale si më parë. Por imuniteti i tufës është diçka e ndërlikuar për t’u arritur.
Ai mund të arrihet vetëm në dy mënyra:duke sëmurur shumë njerëz, ose duke iu dhënë shumë njerëzve një vaksinë efektive dhe të sigurt. Por konsensusi midis epidemiologëve, është se synimi i arritjes së imunitetit të tufës pa një vaksinë, nuk do të funksiononte. Ja cilat janë 6 arsyet:
- Askush nuk mendon se është ide e mirë që të infektohen të gjithë, por vetëm infektimi i të rinjve është pothuajse e pamundur
Udhëheqësit në Suedi, u tërhoqën nga strategjia e tyre liberale për arritjen e imunitetit të tufës kundër virusit, pasi koronvirusi vrau shumë njerëz në azilet e pleqve. Qasja e Suedisë nuk ndoqi atë që sugjeron “Deklarata e Madhe e Barringtonit”:mbrojtje e përqendruar për mëtë rrezikuarit, dhe infektim i qëllimshëm i të rinjve dhe i të shëndetshmëve. Një ide e ngjashme është provuar edhe në disa shtete të SHBA-së, por pa shumë sukses.
- Covid-19 ka shumë efekte anësore afatgjata, që do të ndikojnë mbi jetën dhe sistemin e kujdesit shëndetësor për vitet që vijnë
Covid-19 nuk vret vetëm njerëzit. Ai ka efekte shkatërruese afatgjata tek shumë prej të mbijetuarve të tij, duke përfshirë dobësimin e sistemit nervor, rënien e flokëve, zhurmën periodike në vesh dhe humbjen e nuhatjes.
Sipas Qendrave për Kontrollin dhe Parandalimin e Sëmundjeve në SHBA, gati gjysma (45.4 për qind) e popullsisë së rritur në vend është e rrezikuar të ketë komplikacione nga Covid-19, duke përfshirë vdekjen, “për shkak të sëmundjeve kardiovaskulare, diabetit, sëmundjet e frymëmarrjes, hipertensionit, apo kancerit”.
- Ne nuk e dimë në fakt se kë vret Covid-19 dhe pse
Në SHBA, më shumë se 45.500 njerëz nën moshën 65-vjeç kanë vdekur nga koronavirusi deri më tani. Është e pamundur të dihet pse infektohet dikush, dhe cili është rreziku i tij i vërtetë. Kanë vdekur dhe fëmijët, apo studentë, dhe shumë të tjerë që nuk kishin domosdoshmërisht sëmundje kronike të konstatuara. Shkencëtarët po e studiojnë ende virusin për të kuptuar më mirë se si funksionon. Por ajo që i bashkon rastet e rënda, mund të jetë sasia e receptorëve ACE-2, që virusi i përdor për të pushtuar qelizat tona.
4. Bllokimet shpëtojnë jetë
Megjithëse janë një masë ekstreme për luftimin e sëmundjeve, bllokimet kanë shpëtuar dhjetëra mijëra jetë në të gjithë botën, në pothuajse çdo kontinent. Është e vërtetë që ato kanë prodhuar pasoja negative.
Shumë njerëz kanë humbur punën e tyre, kanë mbyllur biznesin, kanë humbur vizitat e planifikuara me mjekun, kanë përjetuar më shumë vetmi dhe kanë filluar të pinë më shumë alkool. Por këto masa kanë blerë kohë që është jetike për zhvillimin e vaksinave dhe zbulimin e praktikave më të mira për trajtimin e pacientit.
- Zhdukja e virusit është e mundur, dhe nuk kërkon vrasjen e disa njerëzve
Disa vende duke përfshirë Australinë, Zelandën e Re dhe Kinën, kanë arritur tashmë “synimin e pamundur” të zero rasteve me Covid-19 (ose gati zero), dhe janë rikthyer kryesisht jetës normale pas bllokimeve të rrepta. Madje Tajvani e bëri këtë pa u mbyllur fare, duke vendosur masa të rrepta të kontrollit dhe mbikëqyrjes, izolim dhe karantinim efektiv, dhe përdorim masiv të maskave.
- Pavarësisht sesa përpiqemi, imuniteti natyral i tufës, ndoshta nuk do të funksionojë për këtë pandemi
SHBA-ja si shumë vende në botë, kanë ende një rrugë të gjatë për të përshkuar për të arritur disa nga pragjet më të ulëta të imunitetit të tufës, që kërkon ekspozimin e 50 për qind (ose më shumë) të popullsisë, në mënyrë që të imunizohet. Në rastin më të mirë, vetëm rreth 10-20 për qind e të njerëzve në të gjithë vendin janë ekspozuar.
Por edhe nëse të gjithë do të ekspozoheshin ndaj virusit, imuniteti natyror i tufës nuk do të funksiononte. Kjo vjen për shkak të mënyrës sesi imuniteti ynë kundër të gjithë koronavirusëve – nga ai i të ftohurës së zakonshme tek koronavirus i ri – zbehet me kalimin e kohës.
Burimi i lajmit: https://www.sciencealert.com/six-reasons-why-heard-immunity-is-a-really-bad-idea
Përshtatur nga TIRANA TODAY
