KQZ ka vendosur që mandatin e Bashkim Finos në Fier, ta marrë socialistja Gentiana Cakrani. Fino humbi betejën nga COVID-19 pak ditë para zgjedhjeve, kur listat e partisë ishim miratuar. Nga ana tjetër, Gledis Çeliku nuk e ka marrë mandatin e lënë bosh nga Tom Doshi në Shkodër, pasi nuk ka dorëzuar formularin e dekriminalizimit.
Kandidati i Partisë Social Demokrate, Gledis Çeliku, ka humbur mandatin e deputetit. Ai renditej i dyti në Shkodër dhe rezultoi fitues në zgjedhjet e 25 prillit. Mirëpo mos-paraqitja e formularit të dekriminalizimit, e ka penalizuar atë.
Komisioni Qendror i Zgjedhjeve vendosi sot që të shpallë moszgjedhshmërinë e tij si deputet në Kuvendin e Shqipërisë, si kandidati i radhës, pas dorëheqjes së kryetarit të PSD-së Tom Doshi. Gledis Çeliku do të zëvendësonte Doshin në Parlament, për periudhën vakante maj-shtator, deri në nisjen e legjislaturës së re 2021-2025. Tom Doshi dha dorëheqjen nga mandati i deputetit një ditë pas zgjedhjeve të 25 prillit. Ai ka sqaruar se do të vijojë jetën në krye të PSD-së, dhe të mbajë të gjitha premtimet që i ka bërë elektoratit të tij. Sipas Doshit, largimi erdhi pasi nuk dëshiron që të bëhet pengesë për partinë.
