Kreu i grupit parlamentar të LSI-së, Petrit Vasili tha se do të jetë vetë deputeti Rehovica ai që e sqarojë situatën lidhur me heqjen e mandatit.
Këtë deklaratë, Vasili e bëri në një bashkëbisedim me gazetarët, teksa tha se nuk ka ende një njoftim zyrtar, megjithatë kjo ka të bëjë me një person, prandaj do jetë deputeti i LSI-së ai që do e sqarojë këtë situatë në ditët në vijim.
“Kam dëgjuar një komunikim nëpërmjet medias, pasi nuk kemi një njoftim zyrtar. Besoj se zoti Rehovica do e sqarojë të gjithë situatën, por në ditët në vijim do njiheni me një qëndrim të tij, sepse kjo ka të bëjë me një person konkret. Do njiheni dhe do kuptoni rolin e gjithsekujt,” tha Vasili.
I pyetur se sa përgjegjësi mban LSI-ja për këtë rast, Vasili ritheksoi se çdo përgjegjësi është individuale.
Prokuroria bën me dije se verifikimet për deputetin e LSI Gledion Rehovica kanë nxjerrë në pah faktin se ai nuk e ka plotësuar formularin saktë të dekriminalizimit, ku dyshohet se ka përdorur dhe një emër tjetër.
