Gazetarja Kimete Berisha, ka kritikuar qëndrimin e Presidentes së Kosovës, Vjosa Osmani lidhur me kryeministrin Edi Rama, për fitoren e zgjedhjeve parlamentare të 25 prillit.
Berisha u shpreh se në urimin e saj, Osmani nuk ia zë emrin në gojë kryeministrit Rama, dhe kjo do të thotë se ajo e urren në emër të Kosovës.
Sipas Berishës, kjo ka bërë që Kosova të refuzojë ndihmën e Shqipërisë për vaksinat kundër koronavirusit, duke i lënë qytetarët kosovarë të vdesin.
Shkrimi i plotë i gazetares:
Një urrejtje e huazuar!
Shqipëria i ka vaksinuar gjysmë milioni shqiptarë, e Presidentes Osmani nuk ia zë goja emrin e Edi Ramës, kur e uron për fitoren në zgjedhje, thuajse e ka rival politik!
Kur nuk ta zë goja emrin e dikujt, do të thotë, e urren.
E urren zyrtarisht, në emër të Kosovës!
Shprehja publike e urrejtjes dhe neverisë është amatorizëm i madh, është disfatë!
Larg është Edi Rama për Ty.
Për Juve.
Përveç vaksinave kineze, e keni refuzuar edhe ndihmën e Edi Ramës me vaksina.
Sepse jeni bë të ‘mëdhejj’!
Ju erdh dita me zgjedh dhe me refuzu!
Mes jetës dhe vdekjes, për inat të Edi Ramës e keni zgjedh vdekjen.
Më e pranueshme vdekja ‘e shqiptarëve nga Covid-19’ sesa vaksina e ‘rivalit politik’.
Po harroni se nuk jeni bërë vet të ‘mëdhej’, po ju ka bërë votuesi, të cilin keni filluar ta habisni!
P.S. Ty të kemi Presidente të ‘ahiretit’, se me të gjallët nuk merresh!
