Qendra tregtare te ‘’Casa Italia’’ ku ra zjarri me pasojë humbjen e jetës së punonjësit të sigurisë, Arjan Sala, është gjobitur me dy milionë lekë.
Shërbimet zjarrëfikëse, kanë dalë në përfundimin se objekti nuk kishte kushtet e duhura të sigurisë për t’u mbrojtur nga zjarri, dhe për këtë arsye, është gjobitur pronari i këtij subjekti tregtar.
Ndërkohë, sipas ekspertizës është arritur në konkluzionin se zjarri u shkaktuar nga shkëndija elektrike e një neoni të vjetër.
Nga hetimet e thelluara, rezultoi se neoni i vjetër ishte në gjendje të amortizuar, dhe se gjatë gjithë kohës qëndronte e nxehtë, teksa ndodhej shumë pranë një dollapi me rroba sintetike.
Si pasojë e shkëndijës, rrobat aty pranë morën flakë dhe zjarri u përhap në mënyrë masive në të gjithë magazinën.
Si ndodhi ngjarja
Arjan Sala, është heroi i ngjarjes së rëndë me përmasa tragjike të ndodhur pasditen e 24 marsit. Ai ishte nisur si çdo ditë në vendin e tij të punës, kur magazina e biznesit privat ku ai punonte ishte përfshirë nga flakët, dhe 33-vjeçari rendi drejt katit nëntokë, ku ndodheshin disa punonjës.
Sipas dëshmive të punëtorëve të tjerë, ai ka mundur që të shpëtojë nga flakët 7 persona, por ka mbetur vetë i bllokuar si pasojë e zjarrit që ka nisur të përhapet brenda në magazinë, ndërkohë që janë gjetur dhe bombulat me të cilat ai kishte tentuar që të neutralizonte zjarrin.
Sala punonte në biznes që prej 3 vitesh, ndërkohë që ka lënë pas një fëmijë 2 vjeçar, bashkëshorten, vëllain e tij të vetëm dhe dy prindërit. 33-vjeçari, i cili ka lindur në Kamëz dhe jetonte në Laprakë, ka punuar dhe më herët si punonjës sigurie.
