Për vite me radhë, gazetarët kanë punuar nën trysni, janë kërcënuar me jetë, por për asnjë çast ata nuk janë ankuar, nuk kanë ngritur zërin për të dhënë një mesazh të qartë. Nga ana tjetër e medaljes qëndrojnë të ‘fortët’, të cilët nuk kursejnë të kërcënojnë me mesazhe, por edhe me armë.
Raste të tilla po shtohen në masë, e nga breshëria e armëve tek shtëpia e Klodiana Lalës, gazetarët tani ndjehen më të fortë se kurrë për tu bashkuar, se profesioni i tyre nuk mund të nëpërkëmbet, e po kështu se jeta është e shtrenjtë. Kur në masë ka ndodhur një sensibilizim me gazetarët, të cilët ishin të pafuqishëm për të dëshmuar se kush i kërcënonte, është gazetari i “Report Tv”, Julian Shota, i cili duke raportuar për shpërthimin me tritol, është kërcënuar nga Llesh Buraku.
Tritoli ishte vendosur tek hyrja e lokalit në pronësi të Llesh Burakut, 53-vjeç, banues në Laç. Nga shpërthimi i tritolit nuk raportohet për persona të lënduar, por vetëm dëme materiale. Pronari i lokalit, i kthyer një një personazh mjaft të njohur për policinë, ka nxjerrë edhe një armë zjarri tip pistoletë, të cilën ia ka drejtuar gazetarit, e kërcënuar me jetë.
Duke iu referuar deklaratave të gazetarit, në vendin e ngjarjes, nuk ka pasur asnjë efektiv policie. Më zhgënjyese ka qënë deklarata e shefit të komisariatit të Laçit, Erdit Rreçeku, ku pasi është kontaktuar nga gazetarët për ngjarjen e rëndë, i është kthyer me një menefregizëm.
“Jam me leje. Të fala”, ka qenë përgjigjja e kreut të policisë së Kurbinit. Përpos rastit kërcënues, edhe më tronditës është qëndrimi i një drejtuesi të policisë, i cili nuk e vë ‘ujin në zjarr’, duke e shpërfillur gazetarin në një formë të tillë.
Situata kriminale në vend ka marrë vëmendjen edhe të klasës politike, ku prej ditësh, ia drejtojnë gishtin njëri-tjetrit për gjetjen e fajtorëve. E në fund është qytetari ai i cili bie brenda kësaj gracke, duke patur frikë për çdo minutë të jetës së tij.
https://tiranatoday.com/gazetari-kercenohet-me-pistolete-ne-koke-nga-i-forti-i-lacit-shokon-shefi-i-policise-jam-me-leje-te-fala/
