Gazetari Jaku Gjoca, i ftuar në emisionin ‘Top Talk’ ka folur rreth sistemit politik dhe pushtetit absolut të kryetarit të partisë.
Gjithashtu, Gjoca ka qartësuar pyetjen që i drejtoi Bashës “E ndjeni veten ju që jeni një oligark politik?”.
I pyetur nëse Basha është oligarku i vetëm politik në Shqipëri, Gjoca tha se pyetja nuk ishte vetëm për kreun e Partisë Demokratike, teksa nënvizoi se oligarku politik është ai që ka në dorë të gjithë vendimmarrjen politike në vend.
“Ai vendos dhe se kush do jenë njerëzit e piramidës së partisë, që nga nr 2 e deri tek më i thjeshti. Ai vendos se kush do jenë deputetët që përfaqësojnë Partinë e tij me anë të listës së mbyllur. Ai vendos se kush do jenë ministrat, drejtorët e Përgjithshëm të të gjithë strukturave të shtetit. Ai vendos se kush do jenë edhe fshesaxhinjtë e institucioneve shtetërore. Jemi 30 vjet në tranzicion dhe leuceminë e demokracisë e shkakton oligarku politik sepse me ligjet qoftë kushtetuese, apo status partie, e kemi bërë kryetarin e partisë dhe kryeministrin fuqiplotë. Gjithë rrjedha politike në Shqipëri është sipas oreksit të Partisë”, deklaroi Gjoca.
Ndër të tjera, gazetari u shpreh se në 30 vitet e tranzicionit, të gjitha ata që ishin nismëtar të demokracisë, janë edhe sot aty.
Për sa i përket pushtetit absolut që ka kryetari i partisë, Gjoca tha se do ishte mirë që këta kryetarë të kenë pranë vetes personalitete që nuk do pranonin të bëheshin lodër e partisë.
“Duhet të pranojmë që kryetari i partisë të mos ketë pushtet absolut. Ai nuk e kupton se duke përqendruar gjithë këtë pushtet, dëmton veten. Pranë tij, do afrohen njerëz servilë. Kryetari i Partisë do kishte mirë që të kishte deputetë personalitete”, tha gazetari.
