Në një takim me përfaqësues të mediave në Kuvend pas vendimit për rregulloren e re, Sekretari i Përgjithshëm i Kuvendit, Genci Gjonçaj, u shpreh se nuk do ketë përzgjedhje pamjesh dhe planesh që do i transmetohen gazetarëve. Sipas tij, janë gazetarët që do të komandojnë sistemin dhe jo sistemi ata.
Gjonçaj ka siguruar 100% transparencë, ndërsa nga ana tjetër, gazetarët nuk tërhiqen dhe kërkojnë që të vijojnë të jenë prezentë fizikisht në komisionet parlamentare të Kuvendit. Në mbledhjen që po zhvillohet në Kryesinë e Kuvendit, po diskutohet për rregulloren e re, një prej të cilave është dhe ndalimi fizik i mediave në komisione për të kaluar në një ‘newsroom’.
“Kemi gjykuar, dhe në vijim të filozofisë në kuadër të transparencës, kushteve komode, seriozitetit që Parlamenti duhet të përfaqësojë, kemi gjykuar se ky sistem siguron 100% transparencë tek gazetari dhe publiku.
Çfarë? Nuk do bëj polemikë me askënd, por sipas vështrimit tim, dhe profesioni im nuk lejon njohuri më shumë. Nëse ju siguroni pamjet e personit që flet në kohë reale, siguroni pamjen e përgjithshme të komisionit, transmetimin e çdo bisede me dhe pa mikrofon, besoj se këto ishin arsyet që na kanë orientuar drejt kësaj qasje që ju thoni ka qenë dikur, nuk e di, i besoj fjalës suaj, keni qenë punonjës i Kuvendit. Kështu që nëse keni ndonjë propozim”, tha Gjonçaj.
