Gazetarët në Afganistan kanë bërë thirrje për mbrojtje ndërkombëtare, nën sundimin taleban. Në një letër të hapur të cituar nga Tolo News i Afganistanit, gazetarët dhe fotografët thanë se jeta e tyre ishte në rrezik serioz.
“Duke pasur parasysh problemet aktuale dhe kërcënimin në rritje për jetën, pronën dhe familjet e punonjësve të medias, ne i bëjmë thirrje Kombeve të Bashkuara dhe vendeve mbështetëse të punojnë së bashku për të shpëtuar jetën tonë dhe të familjeve tona”, thuhej në deklaratë.
Një gazetar postoi në Twitter një fotografi të një spikereje afgane të lajmeve, që punonte nën vëzhgimin e një grupi luftëtarësh të armatosur talebanë. Ja se çfarë shkruante në foton në fjalë: “A mendoni se në rrethana të tilla është e mundur të vazhdosh të punosh si gazetar? Kjo situatë nuk është e pranueshme”.
Burimi i lajmit: BBC. Përshtatur nga Tirana Today
