Bashkimi Evropian ka humbur betejën ligjore në Bruksel për ta detyruar kompaninë britaniko-suedeze AstraZeneca, që ta furnizojë BE-në me 120 milionë doza të vaksinës kundër koronavirusit deri në fund të muajit qershor.
Por, Presidentja e Komisionit Evropian Ursula von der Leyen tha se vendimi mbështeste pikëpamjen e BE, se AstraZeneca, kundër së cilës blloku ka nisur kohët e fundit një proces të dytë gjyqësor, nuk kishte arritur të përmbushë angazhimet e saj, shkruan Swiss Info.
AstraZeneca u angazhua në një kontratë për të dhënë 300 milion doza 27 vendeve deri në fund të qershorit, por problemet e prodhimit e çuan ndërmarrjen të shpërndante vetëm 100 milion vaksina.
Shkurtimet e furnizimit vonuan vaksinimin e BE-së në tremujorin e parë të vitit, gjë që çoi në një mosmarrëveshje të ashpër dhe në veprimet ligjore të BE për të marrë të paktën 120 milion doza. Gjykata vendosi që kompania duhet të dorëzojë vetëm 80.2 milion doza deri me 27 shtator.
Muajin e kaluar, Bashkimi Evropian nisi një proces të dytë gjyqësor kundër kompanisë britaniko-suedeze, duke kërkuar ndëshkime financiare për vonesat në furnizimin e vaksinave.
