Fondacioni “Fundjavë Ndryshe” ka marrë sonte çmimin special nga Dhoma e Tregtisë dhe Industrisë në Tiranë. Çmimi i jepet Drejtorit të Fondacionit, Arbër Hajdari për punën që ka bërë më ndihmën ndaj të varfërve, por dhe me sensibilizimin e vullnetarizmit. Hajdarit iu dha çmimi nga përfaqësuesja e UNDP në Tiranë.
Kryetari i Dhomës së Tregtisë dhe Industrisë në Tiranë, Nikolin Jaka në fjalën e tij për të pranishmit tha se sot është arritur një marrëveshje midis Fondacionit “Fundjavë Ndryshe”, Dhomës së Tregtisë dhe Industrisë në Tiranë dhe Programit të Zhvillimit të Kombeve të Bashkuara (UNDP Albania). Jaka tha se “në bazë të kësaj marrëveshje, 2% e fitimit vjetor të bizneseve që janë të regjistruara në Dhomën e Tregtisë dhe Industrisë, do të menaxhohen nga fondacioni Fundjavë Ndryshe në ndihmë të njerëzve në nevojë dhe implementimi i këtij projekti do të monitorohet nga UNDP.”
Përfaqësuesja e UNDP deklaroi se është shumë e kënaqur me marrëveshjen që është arritur sot. Ajo tha se “me marrëveshjen do të arrijmë të bëjmë punë të mira dhe ta bëjmë biznesin sa më kompakt dhe efektivitetin e biznesit”.
Drejtori i “Fundjavë Ndryshe”, Arbër Hajdari falenderoj Dhomën e Tregtisë dhe Industrisë në Tiranë për çmimin dhe tha se “marrëveshja e nënshkruar sot është e rëndësishme për trajtimin e familjeve në nevojë që ata të dalin nga varfëria. Ne jemi të gatshëm të ndihmojmë dhe shqiptarët në nevojë që janë jashtë Republikës së Shqipërisë por mjafton që të kemi mbështetjen e biznesit vendas.”
Sonte janë shpërndarë shumë çmime për bizneset dhe sipërmarrjet e suksesshme. Kryetari i Bashkisë së Tiranës, Erion Veliaj gjithashtu u nderua me çmim për vizioni ekonomik që ka Bashkia e Tiranës për të realizuar investime të suksesshme në kryeqytet.
