Grupi “Mara” i Groningenit të Hollandës është rikthyer në “Fundjavë Ndryshe”, duke iu bashkuar aktiviteteve dhe projekteve të shumta.
Plot 40 studentë të “Marës” i’u bashkuan aktiviteteve, duke marë pafundësisht falenderime dhe mirënjohje nga dhjetra familje që janë lënë në mëshirë të fatit.
Themeluesi dhe drejtori ekzekutiv i “Fundjavë Ndryshe”, Arbër Hajdari, ishte së bashku me të rinjtë, duke zbuluar punët që janë realizuar deri më tani, e të cilat hapin siparin e një sërë projektesh mjaft të frytshme.
Ai zbuloi detaje nga projekti i ri, në bashkëpunim me grupin “Mara”. Arbër Hajdari theksoi ndër të tjera se kemi të bëjmë me një projekt ambicioz, ku kryefjalë janë familjet shqiptare, duke u dhënë një dorë në ringritjen e ekonomisë. Më konkretisht ka të bëjë me një supermarket, i cili do të shesë të gjithë produktet që vijnë nga familjet në nevojë. Këto produkte do të kontrollohen, e më tej do të ambalazhohen nga fondacioni i “Fundjavë Ndryshe”, dhe do të shiten me çmim të arsyeshëm, për të suportuar të gjitha familjet shqiptare të cilat e kanë të pamundur për të gjetur një treg ku ti shesin.
“Jemi në qendrën e Solidaritetit, me grupin më të madh të studentëve që ka ardhur nga Mara. Ky grup studentësh të rinj, kanë ardhur për t’iu bërë krah familjeve shqiptare, duke dhuruar ndihma të ndryshme, me punë vullnetare.
Sot jemi duke bërë çeljen e punimeve për një projekt të ri, ku bashkëpunëtor kemi edhe “Marën”. Një projekt i tillë ka të bëjë me zhvillimin e mikroekonomisë së familjeve shqiptare, ka të bëjë me një supermarket i cili do të shesë të gjithë produktet që vijnë nga familjet në nevojë. Produkte që do të kontrollohen, do të ambalazhohen nga fondacioni i “Fundjavë Ndryshe”, dhe do të shiten me çmim të arsyeshëm, në mënyrë që ne ti suportojmë ato familje që nuk kanë ku të shesin produktin e tyre.
Bashkë me disa nga anëtarët e “Marës”, do të bëjmë fillimin e punimeve të një ndërtese të re, e cila do të jetë këtu në qëndrën e Solidaritetit, dhe nuk kam fjalë tjetër, por ti falenderoj që gjejnë kohë për të ardhur në Shqipëri, për ti suportuar me ndihma të ndryshme shqiptarët. Duke suportuar me një projekt masiv të shpërndarjes së sobave të drurit gjatë këtyre ditëve që kanë qenë në Tiranë. Me dhjetra pako ushqimore, ilaçe, detergjentë, pako humanitare duke i shpërndarë. Të gjithë e kemi një detyrim që ti themi faleminderit dhe mirënjohje që kanë lënë punët e tyre dhe shkollën, për të suportuar projektet tona”, përfundoi fjalën themeluesi i “Fundjavë Ndryshe”, Arbër Hajdari,
Prej ditësh, të rinjtë e grupit “Mara” kanë qenë në teren, dhe pamjet në fjalë dëshmojnë punën e pakursyer ndaj familjeve në nevojë, ku janë shpërndarë me dhjetra pako ushqimore.
Të rinjtë u ndanë në disa grupe, ku secili grup, bashkë me koordinatorët e “Fundjavë Ndryshe” organizuan projekte të veçanta, ndër të cilat ishin shpërndarja e pakove ushqimore dhe higjenike, shpërndarje e stufave dhe ngrohëseve për familjet në skamje.
Aktivitet festiv në jetimoren e fëmijëve me aftësi të kufizuara, shpërndarje lodrash dhe materiale shkollore për fëmijët e shkollave të zonës, pajisja e Qendrës Shëndetësore me medikamentet, ilaçet dhe pajisje të tjera të nevojshme.
