Turqia ka lëshuar një urdhër arresti ndërkombëtar për themeluesin e një platforme të tregtisë së kriptomonedhave Faruk Fatih Ozer, i cili u arratis drejt Shqipërisë me 2 miliardë dollarë të cilat i ka përfituar nga 391,000 investitorë.
Ozer i quajti akuzat kundër tij “të pabazuara” dhe tha se ai është në Shqipëri për takime pune, shkruan BBC.
Interpoli lëshoi një njoftim të kuq për Ozer ditën e djeshme, pasi mori një kërkesë nga Ankaraja zyrtare.
Një numër në rritje i qytetarëve turq po vendosin të përdorin kriptovaluta në përpjekje për të mbrojtur kursimet e tyre nga një rënie e mprehtë e vlerës së monedhës vendase, lira.
Por, tregu turk i kriptovalutave është i parregulluar. Javën e kaluar, Turqia tha se do të ndalonte përdorimin e kriptovalutave për të paguar për mallra dhe shërbime nga 30 prilli.
