Pas sulmit me thikë ndaj trajnerit Ernest Gjoka, klubi i Vllaznisë kërkoi shtyrjen e ndeshjes me Luftëtarin, në një njoftim zyrtar.
Sot, vjen edhe përgjigja e Federatës Shqiptare të Futbollit, e cila mësohet se e ka pranuar këtë kërkesë, ndërsa është vendosur që ndeshja të zhvillohet vetëm një ditë më pas, konkretisht të dielën në orën 14:00.
Ndeshja Luftëtari-Vllaznia ishte planifikuar të zhvillohej ditën e shtunë në orën 14:00.
Sulmi ndaj trajnerit të Vllaznisë, Ernest Gjokës, ndodhi pasditen e djeshme pasi përfundoi seancën stërvitore me ekipin. Menjëherë pas ngjarjes ai i ka shkuar në Drejtorinë e Policisë së Shkodrës, ku ka qëndruar për rreth tre orë dhe ka dëshmuar. Në momentin që trajneri është larguar nga policia ka dhënë edhe një deklaratë të shkurtër për mediat.
“Nuk e di çfarë të them. Ishte një akt i shëmtuar Futbolli nuk është kështu dhe nuk duhet të jetë kështu. Nuk e njoh personin qe më sulmoi. Futbolli duhet të shërbeje për tjetër gjë. Futbolli që të eci përpara do mirëkuptim dhe dashuri. Nuk bëhesh dot futbollist me zor.
Unë e di që kam një ekip që më mbështet shumë. Nuk e di ku është kjo urrejtje kaq e madhe. Kjo që ndodhi unë mendoj që të na kthehet në forcë dhe të ecim përpara. Këtë ngjarje duhet ta shikojmë si një pjesë të keqe, por që kjo nuk është Shkodra. Për pjesën e shtyrjesh të ndeshjes, do flas me kryetaren.
Kam menduar se kam ardhur në Shkodër në një qytet ndryshe, qyteti kulture dhe sportdashës. Shyqyr patëm fat, patëm Zotin para, unë uroj që kjo gjë të mos i ndodhi askujt. Unë mendoj që duhet të ndryshoj mentaliteti që të ecim përpara. Nuk është çështja që erdhi dikush i fshehur me kapele dhe me xhup deri te goja dhe goditi Gjokën.
Për të ecur përpara dhe për tu bërë një vend i lirë demokratik, duhet të jemi njerëz të qytetëruar. Policia do të bëjë detyrën e vet dhe jam i sigurt që do ta bëjë mirë”, u shpreh Gjoka.
