Pak ditë më parë Lorik Cana mbylli karrierën si futbollist në Shkodër, por deklaroi se ai nuk do të ndahet kurrë nga bota e futbollit. Ish-kapiteni i Kombëtares shqiptare, e kishte të hapur derën e FSHF për të dhënë kontributin apo bashkëpunimin në çdo lloj mënyre. Pikërisht tani Loriku është shpallur nga FSHF, Ambasador i Grassroots. Ky është një projekt global për futbollin e fëmijëve por jo vetëm. Lorik Cana pasi mori këtë titull theksoi: “E konsideroj vetën pjesë të kësaj familjeje për të promovuar futbollin në vendin tonë. Kur kemi diskutuar për projektin e “Grassroots”, jam bindur se mund t’i shtyj njerëzit të merren me sport. Është një program që nxit dëshirën te fëmijët për të luajtur futboll, pse jo edhe të shkëlqejnë. Në vendin tonë ka shumë gjëra të mira që mund të bëhen. Si Ambasador i “Grassroots” shpresoj të ndikoj që fëmijët të rriten me frymën e sportit. Është një detyrë që kërkon projekte të mëdha, por mund të marrim rezultate shumë më të mira në të ardhmen”.
FSHF ka disa kohë që ka filluar të aplikojë forma të ndryshme për të përfshirë sa më shumë fëmijët në projektet futbollistike, e tashmë me ndihmën e Lorikut që ka është një idhull në futboll për çdo fëmijë shqiptar do ta ketë më të lehtë. Do të ketë një shtrirje më të gjerë të aktiviteteve sportive në të gjithë Shqipërinë që të luajnë futboll, ku do të përshihen që nga fëmijët e deri tek femrat, por edhe mosha të tjera joprofesioniste. Presidenti i FSHF, Armando Duka bëri prezantimin e Lorik Canës si Ambasador të Grassroots, gjatë fjalimit ai u shpreh se: “Është prioritet absolut për FSHF-në futbolli i fëmijëve, një projekt që do të vazhdojë. Sot duhet të mendojmë për të ardhmen dhe besoj se çdo fëmijë e ka ëndërr të bëhet i suksesshëm si Lorik Cana. E shfrytëzojmë këtë shembull pozitiv. FSHF do ta mbështesë Lorikun në çdo hap që do të ndërmarrë”.
Lorik Cana u nderua nga FSHF me një ceremoni speciale në “Loro Boriçi”, para ndeshjes që zhvilloi kombëtarja jonë me Italinë. Por nderimet për ish kapitenin nuk mbaruan me kaq, pasi një organizim i tillë ku ai shkelmoi topin e fundit iu organizua edhe në Francë. Në ndeshjen Marseille-PSG një javë më parë Cana shkelmoi topin e fundit, pasi ka qenë një idhull për tifozët e Marseille, gjatë kohës që ka luajtur atje dhe ka mbajtur shiritin e kapitenit.
