Lëkundjet e tërmetit nuk janë ndalur, duke pasuar njëra-tjetrën, por intensiteti i tyre ka ardhur në rënie. Sizmologët thonë se tërmeti i së martës me fuqi 6.3 të shkallës Rihter, është më i fuqishmi që ka goditur vendin dekadat e fundit.
Tërmeti që la pas dëme të konsiderueshme dhe disa viktima, sipas sizmiologëve ka patur epiqendrën në të njëjtën zonë aktive që prej tërmetit të 21 Shtatorit. Aktualisht po zhvillohen operacionet e shpëtimit në Durrës, pranë stadiumit “Niko Dovana”, te Hotel “Miramare” dhe në Thumanë të Fushë-Krujës. Grupet e shpëtimit janë duke zhvilluar operacione për nxjerren e personave që ndodhen nën rrënoja.
Banorët kanë ende frikën e tërmetit shkatërrimtar, e ndërsa qëndrojnë jashtë banesave. Sikundër shihet edhe në fotot e siguruara nga “Tirana Today”, mjaft familjarë kanë gjetur si zgjidhje për të qëndruar jashtë në natyrë, nëse ndodh një tjetër tërmet i fortë.
