Lija e majmunit, për shkak të përhapjes nëpër botë, ka shtuar edhe më tej frikën për ta parandaluar. Organizata Botërore e Shëndetësisë paralajmëroi se mund të ketë rritje të rasteve me virusin e rrallë, për shkak të organizimit më të madh të festave në muajt e verës. Nga ana tjetër, epidemiologu Ilir Alimehmeti ka qetësuar popullatën se ky virus nuk paraqet rrezikshmëri. I ftuar në emisionin “Abc-ja e mëngjesit”, tha se nuk ka nevojë për vaksinim, pasi situata nuk është aq shqetësuese sa është paraqitur.
“Është një sëmundje shumë e rrallë. Por kemi dhe një ndërgjegjësim më të lartë nga viruset. Nuk ka nevojë për vaksinim, sepse nuk është aq shqetësuese. Në 2020, Republika e Kongos ka deklaruar 4600 raste, por nuk ia vuri njeri veshin. Në 2022 kaloi Covidi dhe çdo lloj virusi përbën lajm.
Sigurisht që duhet parë, sistemi duhet ta ndjekë, por është sëmundje ngjitëse që ka transmetueshmëri të ulët. Megjithatë është e mundur që nëse qëndrojmë pranë një personi që ka linë… Lija duket, shumica dërrmuese shfaqet në fytyrë”, tha epidemiologu.
E identifikuar fillimisht tek majmunët, kjo sëmundje përhapet në rastet e kontaktit shumë të afërt dhe rrallë herë ka dalë jashtë Afrikës. Shkencëtarët nuk presin shpërthim, sikurse të koronavirusit, sepse ky virus nuk përhapet lehtë si SARS-COV-2, por sërish bëjnë thirrje për kujdes. OBSH ka thënë se rastet e fundit janë të pazakonshme, sepse pothuajse të gjithë individët e prekur nga virusi, nuk kanë pasur histori të udhëtimit në zonat ku lija e majmunëve është endemike.
