Dy shtetas kinezë, të cilët punojnë në Maqedoninë e Veriut, janë izoluar në Kërçovë.
Thuhet se para se të vinin në Maqedoni, ata kanë qëndruar në vetë-izolim për dy javë në shtëpitë e tyre të cilat ndodhen 1000 km larg Wuhanit, vatrës së virusit vdekjeprurës.
Me rekomandim të autoriteteve kompetente, tani i janë nënshtruar një vetë-izolimi tjetër dyjavor në Kërçovë.
“Folëm me personat e ardhur nga Kina për gjendjen e tyre shëndetësore. Ata na thanë se në periudhë prej 14 ditësh derisa kanë qëndruar në vetë-izolim nuk kanë pasur asnjëfarë simptomatologjie klinike që lidhet me këtë sëmundje.
Pavarësisht kësaj, Inspektor i Institutit të Shëndetit Publik në përputhje me vendimin tonë për vendosje nën mbikëqyrje i vendosi dy personat nën mbikëqyrje shëndetësore, për 14 ditë, aq sa është periudha e inkubacionit për virusin Covid19. Personat do të vendosen në fshatin izvor të Kërçovës në një barakë adekuate në vetëizolim.
E njëjta procedurë do të bëhet me të gjithë personat që do të vijnë në Aeroportin tonë sepse vijnë më paralajmërim paraprak”, deklaroi Zharko Karaxhoski, Instituti i Shëndetit Publik.
